Ole Gunnar Solskjaer është njeriu i duhur për të qenë në Manchester United. Ai është thjesht duke e bërë punën e gabuar.

Kërkimi i Manchester Unitedi për një gol të dytë në minutat e fundit të ndeshjes kundër Arsenalit i reflektoi mirë tentimet e klubit për ta gjetur një drejtor të futbollit. Ti thjesht e dije se ata nuk do të ishin të suksesshëm, shkruan AS.

Nën Ole Gunnar Solskjaer, Manchester Unitedi i ka shënuar dy ose më shumë gola vetëm një herë në 15 ndeshjet e fundit në të gjitha garat, një statistikë kjo që bëhet më shqetësuese me çdo minutë që kalon.

Kundër Arsenalit, pamjet kur Solskjaer po e kritikonte Andreas Pereira sepse ai s’kishte qëndruar në pozitën e duhur i përshtateshin periudhës së tij si trajner i “Djajve të kuq”. Solskjaer po tentonte ta detyrojë një mesfushor qendror të kufizuar të luajë si sulmues anësor.

Tani ka filluar të duket se edhe Solskjaer është zgjedhja e gabuar për pozitën e trajnerit të Manchester Unitedit. Zgjidhja? Bëjeni atë drejtor të futbollit në vend të kësaj.

Gjatë vitit të kaluar, Manchester Unitedi është raportuar se i ka pasur disa kandidatë për pozitën e drejtorit të futbollit apo drejtorit sportiv. Megjithatë, klubi anglez asnjëherë s’arriti ta emërojë dikë në një pozitë të tillë.

“Sa i përket spekulimeve për një drejtor të futbollit, ne vazhdimisht jemi duke e shqyrtuar mundësinë për ta zhvilluar strukturën tonë drejtuese. Shumë prej spekulimeve kanë qenë të lidhura me departamentin e rekrutimeve dhe ne mendojmë se lojtarët që i kemi transferuar këtë verë e kanë dëshmuar se e kemi qasjen e duhur”, ka thënë Ed Woodward, drejtori ekzekutiv i klubit.

Rrjedhimisht, Manchester Unitedi nuk është më afër emërimit të një drejtori të futbollit. Por, siç e theksoi edhe Woodward, njeriu i duhur tashmë është në Old Trafford. Ai është thjesht i emëruar në pozitën e gabuar.

Tri transferimet e Manchester Unitedit këtë verë – Harry Maguire, Aaron Wan-Bissaka dhe Daniel James – e kanë përmirësuar skuadrën dhe konsiderohen si futbollistë të vlefshëm për të ardhmen e klubit. Manchester Unitedi nuk ka qenë në gjendje të bëjë rekrutime të tilla që kur Sir Alex Fergusoni u largua para gjashtë vjetëve.

Edhe pse negociatat u drejtuan nga Matt Judge, kryesuesi i negociatave në Manchester United, këto ishin transferimet e Solskjaerit, të rekomanduara nga Solskjaer, të implemetuara në rindërtimin që Solskjaeri po ia bën ekipit të parë. Tashmë kanë filluar negociatat për transferimet e janarit, mirëpo askush nuk do të bëhet lojtar i Unitedit nëse nuk përshtatet me filozofinë e Solskjaerit se si duhet të jetë një lojtar i “Djajve të kuq”.

Përtej transferimeve, Solskjaer është edhe duke e shtruar rrugën nga akademia e klubit te ekipi i parë. Në korrik, ish-bashkëlojtari i tij, Nicky Butt, u emërua në një rol tjetër, atë të kryesuesit të zhvillimit të ekipit të parë, për të punuar specifikisht me trajnerin në identifikimin e lojtarëve të akademisë që e meritojnë një mundësi në ekipin e parë. Nga kjo strukture e re tashmë kanë përfituar Mason Greenwood, Tahith Chong, Angel Gomes, Brandon Williams, James Garner dhe Axel Tuanzebe – të gjithë këta janë në skuadër për ndeshjen e sotshme kundër Alkmaarit.

Solskjaer e kupton Manchester Unitedin: historinë e klubit, pritshmëritë, kërkesat për stilin e lojës dhe lojtarët që duhen për t’i përmbushur këto kritere. Ai e kupton rëndësinë e akademisë dhe di si të ndërtojë ura drejt ekipit të parë. Ai e kupton rëndësinë e njëmendësisë në afatet kalimtare dhe e ka dëshmuar se di t’i bëjë transferimet e duhura. Ai është personi i duhur për pozitën e drejtorit të futbollit të Manchester Unitedit. /Gazeta Expre